सिंदेवाही : २७/०९/२०२५ लोकविद्यालय तळोधी (बा) येथील पदवीधर शिक्षक संतोष नन्नावार यांच्या मार्गदर्शनाखाली विद्यार्थ्यांनी सिंदेवाही येथील पोलीस स्टेशनला भेट देऊन पोलीस निरीक्षक (PI) श्री.कांचन पांडे यांच्याशी संवाद साधला व पोलिस स्टेशन कसा चालतो याची माहिती जाणून घेतली.
या वेळी पांडे सरांनी विद्यार्थ्यांना कायदा व सुव्यवस्था, वाहतूक नियमांचे पालन, सायबर सुरक्षितता, शिस्तबद्ध जीवन, जबाबदार नागरिक होण्याचे महत्त्व याबाबत सविस्तर मार्गदर्शन केले. तसेच व्यसनापासून दूर राहणे, वाईट संगती टाळणे आणि सामाजिक नियमांचा आदर करणे या संदर्भातही त्यांनी विद्यार्थ्यांना उपयुक्त सूचना दिल्या.
संवादादरम्यान विद्यार्थ्यांनी विविध प्रश्न विचारले असता पांडे सरांनी सोप्या उदाहरणांतून समाधानकारक उत्तरे दिली. या उपक्रमामुळे विद्यार्थ्यांमध्ये पोलीस प्रशासनाविषयी विश्वास वाढला असून समाजात त्यांच्या भूमिकेबाबत जागरूकता निर्माण झाली.
यावेळी तळोधी (बा) पोलीस स्टेशनचे ठाणेदार राहुल गुहे ,राणी धोडवे, नारायण येग्गेवार व सिंदेवाही पोलिस स्टेशनचे कर्मचारी उपस्थित होते.