चंद्रपूर :
बल्लारपूर शहर व परिसरात भीतीचं साम्राज्य निर्माण करणारा कुख्यात गुंड आकाश ऊर्फ निना आनंद अवतार राऊत (वय ३७) याच्यावर बल्लारपूर पोलिसांनी धडाकेबाज कारवाई करत महाराष्ट्र गुंडगिरी नियंत्रण कायदा (MPDA) अंतर्गत एक वर्षासाठी कारावासाची शिक्षा सुनावली आहे.
आकाश ऊर्फ निना राऊत हा गेल्या काही वर्षांपासून विविध गंभीर गुन्ह्यांमध्ये सामील असून, त्याच्या कृत्यांमुळे परिसरात नागरिकांमध्ये भीती व असुरक्षिततेचे वातावरण होते. धमक्या देणे, मारहाण, बेकायदेशीर वर्तन अशा अनेक प्रकारांतून तो लोकांना त्रास देत होता.
त्याच्याविरुद्ध नऊ गंभीर गुन्ह्यांची नोंद विविध पोलीस ठाण्यांत आहे. वारंवार अटक होऊनही तो पुन्हा गुन्हेगारी मार्गाकडे वळत होता. त्याच्या दहशतीला आळा बसावा आणि नागरिकांना दिलासा मिळावा यासाठी पोलिसांनी MPDA अंतर्गत कठोर कारवाई करण्याचा निर्णय घेतला.
ही कारवाई जिल्हा पोलीस अधीक्षक म.स. शेखर यांच्या मार्गदर्शनाखाली, उपविभागीय पोलीस अधिकारी रमेश माने यांच्या देखरेखीखाली व पोलीस निरीक्षक मुजावर यांच्या पुढाकाराने करण्यात आली.
पोलिसांच्या या निर्णायक पावलामुळे बल्लारपूर शहर व परिसरात सुटकेचा नि:श्वास सोडला जात असून, नागरिकांनी पोलिसांचे कौतुक केले आहे. पोलिसांनीही इशारा दिला आहे की, गुंडगिरी करणाऱ्यांना सोडले जाणार नाही आणि कायद्याचा कठोर बडगा कायम राहील.