शंकरपूर/चिमूर/चंद्रपूर :
शंकरपूर जवळील लावारी गावात गुरुवारी (दि.१८) सकाळी ८ वाजेच्या सुमारास विद्या मसराम या महिलेवर वाघाचा हल्ला झाला, ज्यात ती ठार झाली. या घटनेने परिसरात संतप्त ग्रामस्थांचा आक्रोश पसरला आणि त्यांनी ठाम भूमिका घेतली की वाघ जेरबंद न होता वनविभागाची कोणतीही गाडी गावातून जाऊ देणार नाही.
या घटनेनंतर चिमूर वनपरिक्षेत्र व ब्रह्मपुरी वनविभागाने तत्काळ मोहीम सुरू केली. गुरुवारपासूनच वाघावर नजर ठेवण्यात आली होती आणि शुक्रवारी (दि.१९) रात्री ८ वाजता वाघ जेरबंद करण्यात आला.
वनविभागाच्या शार्पशूटर अजय मराठे व पशुवैद्यकीय अधिकारी डॉ. रविकांत खोब्रागडे यांच्या अचूक कारवाईत वाघ बेशुद्ध केला गेला आणि पिंजऱ्यात बंदिस्त करण्यात आला. नंतर त्याला पुढील उपचार व देखरेखीसाठी चंद्रपूर येथील टीटीसी सेंटर कडे हलविण्यात आले.
सदर कारवाईत ब्रह्मपुरी वनविभागाचे सहाय्यक उपवनसंरक्षक महेश गायकवाड, चिमूर वनपरिक्षेत्र अधिकारी किशोर देऊळकर, बायोलॉजिस्ट राकेश आहुजा व अन्य वनकर्मचारी उपस्थित होते.
ग्रामस्थांनी वाघाच्या जेरबंदीनंतर दिलासा व्यक्त केला असून, वनविभागाच्या तत्परतेची प्रशंसा केली आहे.